jump to navigation

tengaduo June 1, 2008

Posted by cukopara in ngawak.
Tags: , ,
4 comments

hehe…

payo cubo kito ngobrol tentang ‘tengaduo’

dak tau aku, dari mano asalnyo istilah tengaduo itu. tapi istilah itu la ceto akrab di kuping wong Palembang.

sebenernyo aku heran jugo, ngapo bilangan seratus limo pulu itu disebut tengaduo.

padahal, men dipikir secaro bahasa, tenga tu artinyo tengah, mungkin biso jadi setengah. duo tu artinyo duo.

jadi, tengahnyo duo.

berapo nian tengahnyo duo? men angko duo tu dibagi duo, hasilnyo kan satu.

dak tu macem ini, jadi kalo ado duo angko, satu samo duo ruponyo tengahnyo tu angko 1,5.

ooo..jadi tengaduo tu maksudnyo pertengahan antara satu samo duo…

jadi men istilah tengaduo ribu, itu artinyo seribu limoratus. masuk akal…

bolela wong Palembang ni…

setau aku sistem bilangan cak ini dak katik di dalem bahaso laen.

kalo duo setengah yang artinyo duo ratus limo puluh, di bahaso Jakarta juga pernah aku denger…

di bahaso Jawo jugo rasonyo ado.

atau mungkin kamu-kamu ni pernah ndenger angko seratus limo pulu disebutke make bahaso laen?

atau mungkin di bahaso laen ado penyebutan khusus untuk angko tertentu?

payo kito bebagi ilmu…

NB: tapi ngapo dak katik istilah tengatigo atau seprapatenem ye?

idup di jakarta itu memang keras, mang May 19, 2008

Posted by cukopara in sekitar kito.
Tags: , , ,
1 comment so far

kato uwong, idup di Jakarta itu keras.

dulu itu aku anggep cuman sebates jargon atawa syair lagu bae.

mak ini ari baru teraso kalo kato-kato itu bener adonyo.

ok lah, aku ni sekarang statusnyo PNS, yang men uji wong tu banyak waktu santainyo.

Alhamdulillah, sekali lagi Alhamdulillah, aku besyukur walaupun cumen PNS rendahan, tapi Alhamdulillah kalu untuk kebutuhan sehari-hari aku masih biso nutup lah. lebih malah. apolagi tubuk ni jugo masih status Single alias lom bebini. nian, bukannyo sombong,bukan maksud ria’.

sejauh ini aku ni belum sampe (kalu pacak jangan sampe) yang namonyo ngerasoke kerasnyo idup di jakarta. tapi aku biso ngomong kalo idup di Jakarta itu keras kerno aku sering nyingok keadaan mak itu.

aku ni sehari-hari men balik pegi begawe seringnyo naek kereta. kadang KRL, kadang KRD. nah kejingokanlah cak mano keadaan masyarakat kelas bawah Jakarta ini.

segalo macem pacak digaweke. segalo barang pacak dijual. men kito di Palembang mungkin agak aneh nyingok wong keliling-keliling njual pena, tapi disini itu la biaso ditawarke di bis-bis, kereta. padahal men kito jingok apolah itu, cuma pena. tapi disini sepacak mungkin biso dijadike duit.

kadang tu aku tepikir, men sehari-hari cumen jual pena, berapo nian dio dapetnyo sehari?

apo bakal tejual galo pulo?

apolagi men dio la punyo anak bini. belum lagi kalo nanggung keluargo.

yo men dijingok mak itu caknyo dak masuk di akal men dio pacak ngidupi keluargonyo dengen jual pena cak itu.

tapi siapo tau? Allah itu kan Maha Pemurah. ye dak?

itu yang di Kereta. belum lagi yang  di pasar-pasarnyo, di pinggir-pinggir jalannyo…

pokoknyo men nyingok keidupan masyarakat kelas bawah Jakarta, teraso nian idup itu keras…

jangan nyingok ke mall-mall nyo…

Alhamdulillah…aku cumen pacak besyukur bae…

kesan aku samo turnamen Thomas-Uber kemaren May 19, 2008

Posted by cukopara in dak keruan, sekitar kito.
Tags: , , ,
add a comment

akhirnyo selesai jugo turnamen Thomas-Uber kemaren.

sebenernyo aku ni dak meloki jalannyo turnamen dari awal sampe selesai.

nontonnyo bae kadang-kadang. pas budak-budak kosan lagi rami nonton, aku melok nonton. men katik yang nonton, aku jugo dak nonton.

tapi dari nonton yang sekilas-sekilas itu aku pengen ngungkapke kesan aku terhadap apo yang kujingok kemaren-kemaren itu.

pertamo, la ceto aku salut samo perjuangan mereka.

biarpun hasilnyo bukan gelar juara, tapi aku yakin mereka-mereka yang ngewakili Indonesia tu suda berjuang semaksimal mungkin. kerno biar cak mano bae, ngewakili Indonesia itu kehormatan, dan alangke sayangnyo kalu kito dak berusaha maksimal. aku be yang kemaren melok nyanyike Indonesia Raya pas waktu Piala Asia kemaren be rasonyo bangga nian, apolagi mereka yang terjun langsung ke lapangan. oi..alangke senengnyo….

keduo, heran.

ngapo ye pemaen-pemaen kito itu kadang sering mbuat kesalahan dewek yang dak perlu. salah servis, bolanyo keno net, sering out dan sebagainyo. yo aku ni dak pulo ngerti soal maen bulutangkis, tapi cak ini-cak ini aku ni tau kalo ado kesalahan di permainan. mereka kan statusnyo la pemaen dunia. la maen bulutangkis betaun-taun. la melok turnamen internasional banyak, tapi ngapo caknyo mereka tu idak konsisten.

seinget aku, jamannyo dulu nonton bulutangkis waktu masih jaman Ricky/Rexy, Joko Supriyanto dkk jarang aku nyingok pemaen-pemaen itu ngelakuke kesalahan. kesalahan tu ado, tapi idak sering. misalnyo kalo lagi ado rally yang panjang, atau pemaen lawan biso nipu atau matike langkah pemaen kito.

tapi yang kujingok kemaren, mada’i pemaen dunia pacak salah servis, servisnyo dak nyampe ke seberang, nyemes la make gaya kantap tapi malah keno net. itu kan namonyo kesalahan dari diri pemaen itu dewek, bukan kerno keahlian musuhnyo.

ngapo nian itu oi? dak kuat nahan tekanan mental apo?

yang cak ini jugo sering aku jingok di timnas bola kito. padahal pemaen kito tu skillnyo bagus (lumayanla) tapi mada’i masih galak salah umpan. men salah-salah umpan budak SSB jugo biso.

justru kito ngarep yang terbaek dari atlit-atlit kito itu.kito ni seneng ngenjuk dukungan.biarpun kala, tapi kalo la betarung maksimal, kami dak kecewa.tapi men la didukung, ternyato maennyo dak pecak yang diharapke, yo cakmano lagi….

cubo tolong diselidiki oi. yang ilmuwan-ilmuwan di bidang olahraga tu cobo dianalisis, apo dio nian yang mbuat olahraga kito ni dak betaji lagi.

men bulutangkis bae la dak pacak nyumbangke prestasi, apolagi yang nak kito banggake?

pengen makanan rumah May 16, 2008

Posted by cukopara in curhat.
Tags: , ,
1 comment so far

mak inila men idup dewe’an.

kadang tu pengen rasonyo makan masakan rumah.

tau dewe’la men kito misalnyo di kantor, beli makanan, pastila dak jauh-jauh dari soto, sate, ayam bakar, daktu pecel lele.

sebenernyo lemak-lemak galo, cumen tula amen ampir tiap ari rasonyo agak males jugo.

ado jugo kadang yang jual nasi biaso cak di warung-warung nasi, tapi tetep tula lain rasonyo men produk massal samo masakan rumah.

kadang tu capek rasonyo tiap nyari makan, makanannyo mak itu – mak itu lagi…

pengen jo’ makan nasi anget make sayur bayem ditambah iwak goreng…

itu rasonyo lebih nikmat dari soto daging

apolagi men kito ketemu pindang patin, Subhanallah….tak sanggup aku nampung iler yang meler-meler ini….

kadang tu kepikiran jugo, sekali-sekali masak dewe’ bae ye…

tapi asak di pikir-pikir, masak dewe’ untuk uwong sikok samo masak untuk wong rami tu samo bae repotnyo.

tarokkela misalnyo masak sayur asem, nggoreng iwak, terus ngulek sambel…

ceto bakal berantakannyo pecak masak untuk wong banyak. tinggal kito be beberesnyo.

kan kito tu masak dewe’ untuk kepuasan.

nah pas masakan la jadi, kito makan, kito puas.

tapi suda tu pas tejingok bekas piring, panci, kuali segalo mecemnyo yang masih numpuk nunggu dicuci laju jadi males.

kendaknyo abis makan lemak, duduk teseler, laju tiduk. nah mak itu baru mantep.

ai dah…kapan pulo pacak punyo dapur dewe’. jadi men berantakan katik yang ribut.

oiyo, punyo dapur dewe’ artinyo punyo rumah dewe’. la belum ado pulo rumahnya.

apolagi yang nak ngisi rumahnyo (baco :bini) hehehe….

oi ngapo laju ujung-ujungnyo ngomongin bini?

yo kiro-kiro cak itulah. intinyo aku ni sebenernyo bosen makan yang itu-itu bae, secaro tubuk ni hobi makan. tapi apo dayo belum pacak….

nasib…nasib….

sepatah duo patah kato May 15, 2008

Posted by cukopara in Uncategorized.
Tags:
add a comment

tes…tes…biji kates…..

halo halo…

permisi numpang joget….

cacam….mak ini ari ado pulok yang ngeblog pake baso Pelembang…

maap nian men blog kito ni nambahi ringam kamu kamu di dunio perblogingan ini.

bukan tubuk nak bikin rusuh apo nyari balak, idak nian…

tubuk cumen pengen, men uji wong barat tu ‘ngekspresike diri’, ‘self actuating’ men kato Wayne Rooney tu

jadi maap maap kato bae, men sekironyo uji kamu tu blog kami ni dak pantes (kerno ado unsur SARA-nyo), yo maap bae dak ye….kami jugo dak pulok nak nyuru-nyuru kamu mbaco….

tapi men sekironyo blog kami ni kamu-kamu nilai perlu dibina apo dibimbing biar jadi bagus, kami dak segen-segen nerimo ajaran kamu tu…malah seneng nian kami ni…

oiyo, biar kato blog kami ni makek baso Pelembang, jangan lantas kamu nyangko blog ini isinyo melulu tentang Pelembang, oi idak pulo…..

blog ini ni sebenernyo blog tentang umum, cumen basonyo bae make baso Pelembang

jadi, men kamu nyangko blog ini isinyo inpormasi tentang Pelembang, maapke la nian….lemak kamu buka situs ini bae…dak tu yang ini

nah cak itu dulu be postingan keduo aku.

keduo kerno yang pertamo la dibikinke samo wordpress.com, dak lemak aku ngapusnyo…

gek disangkonyo dak ngargoi tuan rumah, ye dak?

payo jadila dulu dak ye….kalu bosen pulok kamu tu mbaco ocehan aku ni….

oiyo, mokasih ye la mampir…..kapan-kapan maen la kesini…

gratis…asal jangan lupo mbayar ongkos warnet apo pulsanyo bae….

Hello world! May 15, 2008

Posted by cukopara in Uncategorized.
1 comment so far

Welcome to WordPress.com. This is your first post. Edit or delete it and start blogging!